ایچ آئی وی

• ایچ آئی وی (HIV)ایک وائرس ہے جوہمارے جسم کے مدافعتی نظام پر حملہ کرتا ہے۔ اگر اس کا علاج نہ کیا جائے تو ایچ آئی وی جان لیوا انفیکشنز اور کینسر کا سبب بن سکتا ہے۔ اچھی بات یہ ہے کہ علاج اور دیکھ بھال جاری رکھی جائے تو ایچ آئی وی کے ساتھ جینے والا شخص لمبی اور صحت مند زندگی گزار سکتا ہے!
•  ایچ آئی وی خون، منی، اندام نہانی اور مقعد کی رطوبتوں، اورچھاتی کے دودھ کے ذریعے منتقل ہو سکتا ہے۔ ایچ آئی وی سے بچنے یا اسے منتقل ہونے سے روکنے کے کئی طریقے ہیں۔
•  ایچ آئی وی کے ہونے یا نہ ہونے کے بارے میں جاننے کا واحد طریقہ یہ ہے کہ آپ ٹیسٹ کروائیں۔

ایچ آئی وی کے بارے میں عام سوالات کے جوابات کے لیے پڑھتے رہیں۔

ایچ آئی وی (HIV) ہیومن امیونوڈیفیشینسی وائرس کا مختصر نام ہے۔ ایچ آئی وی ایک ایسا وائرس ہے جو مدافعتی نظام یعنی بیماری اور انفیکشن کے خلاف جسم کی دفاعی صلاحیت پر حملہ کرتا ہے۔ مدافعتی نظام صحت کے لیے ضروری ہے۔

اگر ایچ آئی وی کا علاج نہ کیا جائے تو یہ مدافعتی نظام کو بہت کمزور کر دیتا ہے۔ جب ایسا ہوتا ہے تو جسم سنگین بیماریوں اور انفیکشنز کے سامنے بے بس ہو جاتا ہے۔ اس حالت کو ایڈز یا ایکوائرڈ امیونوڈیفیشینسی سنڈروم کہا جاتا ہے۔

اب اس بیماری کا مؤثر علاج موجود ہے جو ایچ آئی وی کے ساتھ جینے والوں کو لمبی اور صحت مند زندگی گزارنے کی صلاحیت دیتا ہے۔

جب کوئی جسمانی رطوبت جس میں ایچ آئی وی موجود ہو، کسی ایسے شخص کے جسم میں داخل ہوجاۓ جسے ایچ آئی وی نہیں ہے تو وہ ایچ آئی وی سے متاثر ہو سکتا ہے۔ خون، منی، اندام نہانی کے مائع، مقعد کے مائع اورچھاتی کا دودھ ایسی جسمانی رطوبتیں ہیں جن میں ایچ آئی وی ہو سکتا ہے۔

ایچ آئی وی بنیادی طور پر جنسی تعلقات اور نشے میں استعمال ہونے والے سامان کے مشترکہ استعمال کے ذریعے منتقل ہوتا ہے۔ تاہم، اب ہم جانتے ہیں کہ ایچ آئی وی کے ساتھ رہنےوالے ایسے لوگ جن پر ادویات اثر کر رہی ہوں اپنے جنسی ساتھی کو ایچ آئی وی منتقل نہیں کر سکتے۔

ان کے علاوہ ایچ آئی وی مندرجہ زیل طریقوں سے بھی منتقل ہو سکتا ہے:

• بچے کوحمل، دوران پیدائش یا چھاتی کا دودھ پلانے سے
•  جراثیم سے آلودہ، ٹیٹو یا جسم کو چھیدنے کےآلات کے استعمال سے
•  جراثیم سے آلودہ طبی، دانتوں یا جراحی کے آلات کے دوبارہ استعمال سے (کینیڈا میں ایسا شاذونادر ہی ہوتا ہے، تاہم دوسرے ممالک میں ایسا ہونے کا زیادہ امکان ہو سکتا ہے)
•  ایسے ممالک جہاں عطیہ کیے گئے خون یا اعضا کا ایچ آئی وی کا ٹیسٹ نہیں کیا جاتا (کینیڈا 1985 سے عطیہ کیے گئے خون اور ٹشوز کو ایچ آئی وی کے لیے ٹیسٹ کر رہا ہے؛ اس سے پہلے، کینیڈا میں عطیہ کیے گئے خون یا ٹشوز کے ذریعے ایچ آئی وی منتقل ہو سکتا تھا)

یہ بات یاد رکھنے کی ہےکہ ایچ آئی وی کبھی بھی گلے ملنے، چومنے یا ہاتھ ملانے، یا بیت الخلاء کی نشستون، دروازے کی کنڈیوں یا برتنوں کے ذریعے منتقل نہیں ہوتا۔

ایچ آئی وی کے لیے کوئی ویکسین نہیں ہے اس لیے ایچ آئی وی سے بچنے کے لیے وہ سب کچھ کرنا چاہیے جو آپ کر سکتے ہیں۔

ایچ آئی وی سے بچنے کے کئی طریقے ہیں:

• جب بھی آپ جنسی تعلق قائم کریں تو ہر بار صحیح طریقے سے کنڈوم استعمال کریں
•  اگر آپ ٹیکے کے ذریعے منشیات استعمال کرتے ہیں، تو منشیات بنانے اور لگانے والے سامان کا مشترکہ استعمال نہ کریں بلکہ ہر بار نئی سویاں، سرنج اور دیگر سامان استعمال کریں ۔
•  ایچ آئی وی سے بچنے کےلیے پری ایکسپوژر پروفیلیکسیس(PrEP) استعمال کریں، یہ ایک ایسی دوا ہے جو وہ لوگ باقاعدگی سے لے سکتے ہیں جنہیں ایچ آئی وی نہ ہواور وہ اس سے بچنا چاہتے ہیں ۔
•  اگر آپ حال ہی میں ایچ آئی وی کے وائرس سے متاثر ہوۓ ہیں، تو پوسٹ ایکسپوژر پروفیلیکسیس(PEP) استعمال کریں۔ اگر یہ دوا وائرس کے جسم میں ممکنہ داخلہ کے 72 گھنٹوں کے اندر لے لی جاۓ تو وہ افراد جنہیں ایچ آئی وی نہ ہو وہ اس سےبچ سکتے ہیں۔
•  اگر آپ کو ایچ آئی وی ہے، تو اپنے جنسی ساتھی کو ایچ آئی وی منتقل کرنے سے روکنے کے لیے مؤثر ایچ آئی وی علاج کروائیں۔
•  اگر آپ کو ایچ آئی وی ہے، تو اپنے بچے کو ایچ آئی وی منتقل کرنے سے روکنے کے لیے اپنے پورے حمل کے دوران مؤثر ایچ آئی وی علاج کروائیں۔
•  اگر آپ کو ایچ آئی وی ہے، تو اپنے بچے کو ڈبے کا دودھ پلائیں ۔ تاہم، اگر آپ خواہشمند ہیں تو ایسا ہو سکتا ہے کہ مناسب طبی مدد کے ذریعے آپ بچے کواپنا دودھ پلاسکیں ۔
•  اگر آپ کینیڈا سے باہر طبی، دانتوں یا جراحی کا علاج کرواتے ہیں، تو یقینی بنائیں کہ آلات یا تو نئے ہیں یا انہیں مناسب طریقے سے جراثیم سے پاک کیا گیا ہے۔
•  اگر آپ کینیڈا سے باہر عطیہ کردہ خون یا اعضا وصول کرتے ہیں، تو تصدیق کریں کہ اس کو خون سے منتقل ہونے والی عام انفیکشنز کے لیے ٹیسٹ کیا گیا ہے۔

ایچ آئی وی سے متاثرہ زیادہ تر لوگوں میں کئی سالوں تک بیماری کی کوئی علامت ظاہر نہیں ہوتی، اس دوران وائرس پھیل رہا ہوتا ہے اور ان کے مدافعتی نظام کو نقصان پہنچا رہا ہوتا ہے۔ اس لیے یہ ممکن ہے کہ آپ کو ایچ آئی وی ہو اور اس کا علم نہ ہو۔

ایچ آئی وی ہونے یا نہ ہونے کے بارے میں جاننے کا واحد طریقہ یہ ہے کہ آپ اپنا ٹیسٹ کروائیں۔

صحت کے عملے سے ایچ آئی وی کا ٹیسٹ کروانے کے لیے بات کریں۔ آپ اس کے ساتھ ہی دوسرے انفیکشنز، جیسے سوزاک، کلیمیڈیا، ہیپاٹائٹس بی، ہیپاٹائٹس سی اور آتشک وغیرہ، کے ٹیسٹ بھی کروا سکتے ہیں، ۔

اگرچہ ایچ آئی وی کا جسم سے مکمل خاتمہ ممکن نہیں، لیکن ادوایات اور مناسب دیکھ بھال کے ذریعےایچ آئی وی کے ساتھ جینے والے لوگ لمبی اور صحت مند زندگی گزار سکتے ہیں۔

ایچ آئی وی کا علاج بہت بہتر ہو چکا ہے۔ علاج بہت مؤثر ہے اور اس کے مضر اثرات نہ ہونے کے برابر ہیں۔

اگر آپ کو ایچ آئی وی ہے، تو اپنے صحت کے عملے سے اپنے علاج کے بارے میں بات کریں۔ علاج جتنی جلدی شروع ہو، آپ کی صحت کے لیے اتنا ہی بہتر ہے۔

ایچ آئی وی وہ وائرس ہے جو مدافعتی نظام پر حملہ کرتا ہے۔ جب مدافعتی نظام شدید کمزور ہو جاتا ہے اورجب جسم سنگین بیماریوں اور انفیکشنز کے سامنے بے بس ہو جاتا ہے، تو اسے ایڈز (AIDS)کہا جاتا ہے۔ یہ ایچ آئی وی انفیکشن سے اگلا مرحلہ ہے۔ تاہم، مناسب علاج کے ساتھ، بہت سے لوگ ایچ آئی وی سے متاثر ہونے کے باوجود،ایڈز کے مرحلے تک پہنچے بغیر، لمبی اور صحت مند زندگی گزار سکتے ہیں ۔

• ایچ آئی وی کے ٹیسٹنگ یا علاج اور دیکھ بھال کے لیے ہیلتھ کیئر فراہم کرنےوالے سے بات کریں۔
• اس پتہ پر اپنے علاقے میں HIV کی خدمات تلاش کریں: (https://whereto.catie.ca).